बारा वरुषाची लेक । झाली आईबाई ।
येडी झाली मायबाई ॥
बारा वरुषाची लेक । झाली परक्याचं धन ।
सई झाली शेजारीन ॥
*
दूरच्या देशींची मी । माझा जीव ऊदासला ।
बंधू माझ्या सोयर्याला । वेगी धाडा जासूदाला ॥
सांगून धाडितें । आल्यागेल्याला गांठून ।
मायबाई माझे । झालें लईंदी भेटून ॥
नीरोप करींते । आल्यागेल्याला पाहून ।
भाईराजसाला माझ्या । सांगा वाडयांत जाऊन ॥
निरोप करीतें । आल्यागेल्या परोपरी ।
भाईराजसा रे माझ्या । भेटी यावं सरासरी ॥
पानवंताच्या बायांनो । सांगा माय हरनीला ।
उतावीळ ग मयना । वेगी धाड बंधवाला ॥
*
माहेरीं जाईल । माहेरीं मायबाई ।
भाईराजसाची राणी । विसाव्याला भावजई ॥
भाऊच्यासारखा । कोन बोलला वाडयांत ।
करीत होतें ताक । रवी सोडली डेर्यांत ॥
घरांत करतें काम । बाहेर माझं मन ।
भाऊच्यासारखं । कोनीं केलं 'रामराम' ॥
*
तुझी वाट रे पाहून । डोळे झाले कुखावानी ।
सोयर्या बंधवा । काशी माया लोकावानी ॥
तुझी वाट रे पाहून । माझे डोळे झाले गारा ।
सोयरा बंधू माझा । गुंतला संसारा ॥
तुझी वाट रे पाहून । लाली डोळ्याची फांकली ॥
बंधवाला माझ्या । आन गळ्याची घातली ॥
*
महीना महीना । भाईराजसाचं घोडं
सख्या राजसाला माझ्या । बहीणीचं फार वेड ॥
सहा महीन्याची भेट । वर्षावर गेली ।
निष्ठूर माया केली । भाईराजसानं ॥
भावजय ग सांवळी । कोन्या राजाची मयना ।
सोयरा भाईराज । सखा भेटीला येईना ॥
*
बहीण ग भाऊ । एक्या वेलाची वाळकं ।
आली परायाची लेक । तिनं केली ताटातूट ॥
बहीणभावाची । बाळपणीं गोडी ।
आली परायाची लाडी । तिनं केली मनमोडी ॥
बहीणभावंडं । एक्या झाडाचीं संतरं ।
मधीं पाडती अंतर । सांवळी भावजई ॥
भाईराजस आपला । भावजय परायाची ।
वेणी घालिते गोफाची ॥
बहीणभावंडं । कांही लागना भेद ।
सीतामालन माझी । रानी मोहळाचा मध ॥
बंधवापरीस । मालन चांगली ।
घडी रंगाची लागली । हजार दींडामंदीं ॥
*
बहीणीचें घरीं । भाऊ गेले लई दीसां ।
गोफाचे कडइरे । बहिण अकलीती फासा ॥
माझ्या घरीं ग सोयरा । आतांची डाळभाजी ।
बंधूच्या भोजनाला । पेढे करीतें मोलबाजी ॥
शेजारीनीबाई । ऊसने दे ग गहूं ।
बंधू आला घरीं । बाजाराला कव्हां जाऊं ॥
शेजारीनीबाई । ऊसन्या दे ग जवा ।
बंधू आला घरीं । बाजाराला जाऊं कव्हां ॥
माझ्या घराला पावना । खांडापानाची तयारी ।
धमनी वाडयाच्या बाहेरीं ॥
*
माझ्या घराला पावना । खांडापानाला बोलवा
धमनी वाडयाला कलवा ॥
घरीं पावने आले । शेजी मने बंधू बंधू ।
भाई ग राजाच्या । छतरीला हिरवे राघू ॥
माझ्या घराला सोयरे । शेजी मने कोन कोन ।
वाडयामधले भाच्चे दोन । मेण्यामंदी पहा खूण ॥
घरा पावना आला । शेजी मनती कोठल्ला ।
माझ्या मातेचा बाळ । मला उमराव भेटल्ला ॥
माझ्या घराला सोयरे । पुरन घालतें पूरती ।
बंधवा माझ्या । करतें पोथीची आरती ॥
घरा पावना आला । शेजी मनीती रीता ।
जरीचा ग खण । त्याच्या खीशामधीं होता ॥
माझ्या मनींची हाऊस । पूरवीली देवाजीनं ।
बंधवासंगं । भाच्चा धाडीला मालनीनं ॥
*
माहेरा जाईल । बसले ढालजंत ।
रान्या माझ्या मालनी । आल्या कम्मानी लवत ॥
माहेरा मी त गेलें । बसले पानवठया ।
पाया पडूं आल्या । मालनी लहान मोठया ॥
माहेराला गेलें । बसेंल तुळशीच्या वटया ।
पाया पडूं आल्या । मालनी न्हानमोठया ॥
*
पाया ग पडुं आली । माझ्या पायाखालें ओलं ।
सीता मालनी माझे । वसरीला चल ॥
पाया पडूं आली । पाया पडूं ग राहूं दे ।
सीता मालनी माझी । बाळ कडंचं घेऊं दे ॥
पाया पडूं आली । नथ ह्या मोरणीची ।
सीताबाई माझी । सून माझ्या हरणीची ॥
पाया पडूं आली । सीता मालन वाकत ।
पाया पड तूं लवून । माझ्या सख्याची ताकीत ॥
पाया पडूं आली । वसरी चढून माडीं गेलें ।
सीता मालनीचं माझ्या । रुप पाहून दंग झालें ॥
पाया पडूं आली । आशीर्वाद देतें खरा ।
जोडयानं राज्य करा ॥
पाया पडूं आली । आशीर्वादाचं वचन ।
जन्मोजन्मीं सवाशीन ॥
पाया पडूं आली । पाया पडन्यांत काय ।
आशीर्वाद देत जाय ।
पाया पडूं आली । माझ्या बंधवाची सीता ।
तिला आशीर्वाद देतां । दारीं राम उभा व्हता ॥
