दृढ श्रद्धेचे
सद्भक्तीचे
सुंदर मांदार येथे डुलव।। प्रभु....।।
उत्साहाची
आनंदाची
थुइथुई कारंजी येथे उडव।। प्रभु....।।
धृताचे अभिनव
घालुन मांडव
त्यावर शांतीचे वेल चढव।। प्रभु....।।
चारित्र्याचे
पावित्र्याचे
शीतल शांतसे कुंज घडव।। प्रभु....।।
सत्प्रतिभेचे
सतज्ञानाचे
गुंगूगुंगू मिलिंद गुंगव।। प्रभु....।।
सहजपणाचे
सतस्फूर्तीचे
करु देत विहंगम गोड रव।। प्रभु....।।
परमैक्याचा
झोला साचा
बांधुन त्यावर जीव झुलव।। प्रभु....।।
फुलवुन जीवन
तेथे निवसुन
मग गोड गोड तू वेणू वाजव।। प्रभु....।।
-धुळे तुरुंग, मे १९३४
भाग्याचे अश्रु
अनुताप- आसवांनी। कासार मानसाचे
भरते तुडुंब तेव्हा। ती भक्तिवेल नाचे
त्या भक्तिवेलावरती। चित्पद्म ते फुलेल
येऊनिया मुकुंद। मग त्यात तो बसेल
रड तू सदैव बाळा। भरु दे तुडुंब हृदय
येईल भक्ति मग ती। होईल सच्चिदुदय
ते भाग्यवंत अश्रु। जवळी तुझ्या विपूल
हसशील लौकरीच। जरि आज तू मलूल
-धुळे तुरुंग, मार्च १९३२
तळमळतो रे तुझा तान्हा
तळमळतो रे तुझा तान्हा।।
कामधेनु तू माझी देवा
चोरु नको रे अता पान्हा। तळमळतो....।।
धन कृपणाला जल मीनाला
तेवि मला तू सख्या कान्ह्या। तळमळतो....।।
गोकुळि गोरस सकळां दिधला
प्रभुजि अजी ते मनी आणा। तळमळतो....।।
अजुन दया जरि तू ना करिशिल
ठेवु कशाला तरि प्राणा। तळमळतो....।।
-नाशिक तुरुंग, ऑगस्ट १९३२
