बाळा जो जो रे । झोप घेई आता ! माझ्या सोनुल्या गोष्ट मी सार्या ।
कथिल्या तुला, जो.॥१॥
झोपला राघु । झोपली मैना । झोप घेई रे । माझ्या नंदना जो. ॥२॥
झोपले इवले । पानांचे बाळ । नको वाजवू । तुझ हा चाळ, जो. ॥३॥
वारा गातो बघ । तुजला अंगाई । म्हणतो हळूच । करी गाई गाई, जो. ॥४॥
इवलासा हत्ती झोपला कसा । आणिक डोळे । मिटतो ससा , जो ॥५॥
खेळणी तुझी । सारी झोपली । निद्रेच्या राज्या । दंग जाहली, जो.॥६॥
चांदोमामा बघ । वर झोपला । स्वप्न पाळणा हळू हलला , जो. ॥७॥
कितीक पर्या । नेतील तुला । दावतील त्या सुख सोहळा , जो.॥८॥
गातिल आणि सुरेख गाणी । बाळा हा माझ्या । घेई ऎकुनी, जो.॥९॥
झोपली धरणी । निळ आकाश माझ्या सोनुल्या । निज तू शांत, जो.॥१०॥
झोपले बाळ । मिटे पापणी । ठेव सुखी देवा । हीच विनवणी, जो.॥११॥
आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
