द्रौणी अस्त्राहातीं । उत्तरा पीडितां सती ॥ गर्भी राखिला परीक्षिती । तैसा पावे श्रीपती ॥ १ ॥
वेगीं ऐका श्रीहरी । धांव पाव मुरारी । चक्र घेऊनियां करीं । भवभय निवारी ॥ २ ॥
इंद्र वरुषें शिळा धारी । गोकुळ पीडितां भारी । राखिले गोवर्धनधारी । तैसा पावे झडकरी ॥ ३ ॥
दुर्वास द्वादशी । छळूं आला अंबऋषी । चक्रें पळवोनी त्यासी । दहा गर्भवास सोसिलें ॥ ४ ॥
सभेंत वस्त्रहरण । पतिव्रता मरण । द्रौपती लज्जारक्षण । अंबर जाला श्रीकृष्ण ॥ ५ ॥
पांडव लाक्ष्याजोहरीं । धडाग्नी पोळत भारी । साहीं जणीं चिंतितां हरी । काढिलें विवरद्वारीं ॥ ६ ॥
देखोनी गुरु तो गत । रणागणीं भ्याला पार्थ । त्यासी सांगुनी गीतार्थ । संग्रामीं केला तुवां मुक्त ॥ ७ ॥
एका जनार्दनी द्त्त । साह्य जाला सतत । मोहे भवभय जेथ । तेथ केला नित्य मुक्त ॥ ८ ॥
आपण साहित्यिक आहात ? कृपया आपले साहित्य authors@bookstruckapp ह्या पत्त्यावर पाठवा किंवा इथे signup करून स्वतः प्रकाशित करा. अतिशय सोपे आहे.
